నవోదయ విద్యాలయాల్లో 6వ తరగతి ప్రవేశాలు

నవోదయ విద్యాలయాల్లో 6వ తరగతి ప్రవేశాలు

నవోదయ విద్యాలయ సమితి వారు దేశవ్యాప్తంగా ఉన్న నవోదయ విద్యాలయాల్లో 6వ తరగతిలో ప్రవేశానికి నోటిఫికేషన్ విడుదల చేసింది. జవహర్ నవోదయ విద్యాలయ సెలక్షన్ టెస్ట్ (JNVST)-2022 ద్వారా అడ్మిషన్లు జరుగుతాయి. భోజన, వసతి సౌకర్యాలతోపాటు బోధన ఉచితం. యూనిఫాం, పాఠ్య పుస్తకాలు కూడా ఇస్తారు. 9 నుంచి 12వ తరగతి విద్యార్థులు మాత్రం విద్యాలయ వికాస్ నిధి కోసం నెలకు 600 చెల్లించాల్సి ఉంటుంది. బాలికలు, SC,ST అభ్యర్థులు పేదింటి పిల్లలకు దీని నుంచి మినహాయింపు వర్తిస్తుంది. 6వ తరగతి నుంచి 8వ తరగతి వరకు మాతృ భాష /ప్రాంతీయ భాషలో బోధన ఉంటుంది. తర్వాత మ్యాథమెటిక్స్, సైన్స్ సబ్జెక్టులను ఆంగ్లమాధ్యమంలో, సోషల్ సైన్స్ ను హిందీలో బోధిస్తారు. ఈ విద్యాలయాల్లో ప్రవేశాలు పొందిన విద్యార్థులకు సెంట్రల్ బోర్డ్ ఆఫ్ సెకండరీ ఎడ్యుకేషన్ (CBSE) వార్షిక పరీక్షలు నిర్వహిస్తుంది.

విద్యాలయాలు- సీట్లు

దేశవ్యాప్తంగా మొత్తం 661 నవోదయ విద్యాలయాలు ఉన్నాయి. ఆంధ్రప్రదేశ్లో 13 నవోదయ విద్యాలయాలు ఉన్నాయి. SC/ST వర్గాల జనాభా అధికంగా ఉన్న ప్రాంతాలకు మరో రెండు విద్యాలయాలు కేటాయించారు. తెలంగాణలో 9 నవోదయ విద్యాలయాలు ఉన్నాయి. ఒక్కో విద్యాలయంలో 6వ తరగతిలో గరిష్ఠంగా 80 మంది విద్యార్థులకు అవకాశం కల్పిస్తారు. జిల్లాల వారీగా సంబంధిత నవోదయ విద్యాలయాల్లో గ్రామీణ విద్యార్థులకు 75% కల్పిస్తారు.

అర్హతలు:

ప్రస్తుతం ప్రభుత్వ/ప్రభుత్వ గుర్తింపు పొందిన పాఠశాలలో 5వ తరగతి చదువుతున్న విద్యార్థులు దరఖాస్తు చేసుకోవాలి. ఎన్ఐఓఎస్ నుంచి బీ సర్టిఫికెట్ కాంపిటెన్సీ కోర్సు పూర్తి చేసిన వారు/ సెప్టెంబర్ 30 నాటికి పూర్తి చేసేవారు కూడా అర్హులే. విద్యార్థులు మే 1,2009 నుంచి ఏప్రిల్ 30,2013 మధ్య జన్మించి ఉండాలి.

నవోదయ సెలక్షన్ టెస్ట్

దీనిని ఆబ్జెక్టివ్ విధానంలో నిర్వహిస్తారు. మొత్తం 80 మల్టిపుల్ చాయిస్ ప్రశ్నలు ఉంటాయి. పరీక్ష సమయం 2 గంటలు. మొత్తం మార్కులు 100. ఈ పరీక్షల్లో మూడు సెక్షన్ లు వుంటాయి. మెంటల్ ఎబిలిటీ టెస్ట్ లో 40 ప్రశ్నలు అడుగుతారు. దీనికి 50 మార్కులు కేటాయిస్తారు. అర్థమెటిక్ టెస్ట్ , లాంగ్వేజ్ టెస్టులకు ఒక్కో దానిలో 20 ప్రశ్నలు ఉంటాయి. ఒక్కో దానికి 25 మార్కులు ఉంటాయి. మెంటల్ ఎబిలిటీ టెస్ట్ కు గంట, మిగిలిన వాటికి ఒక్కో దానికి అర్ధ గంట సమయం ఇస్తారు. విద్యార్థులు బ్లూ/బ్లాక్ బాల్ పాయింట్ పెన్‌తో సమాధానాలు గుర్తించాలి. తెలుగు రాష్ట్రాల్లో ఈ పరీక్షని తెలుగు, ఇంగ్లీష్, హిందీ, మరాఠీ, ఉర్దూ, ఒరియా, కన్నడ మాధ్యమాల్లో నిర్వహిస్తారు.

-ఆన్లైన్ దరఖాస్తుకు చివరి తేదీ:
నవంబర్ 30, 2021.

-JNVST 2022 పరీక్ష తేదీ:
ఏప్రిల్ 30, 2022.

అఫీషియల్ వెబ్సైట్: www.navodaya.gov.in